آدمجی لائف آشورنس اور فیصل فنڈز کا اشتراک، یونٹ ہولڈرز کو بیمہ زندگی کی اضافی مراعات کی فراہمی

پاکستان میں فیملی تکافل کی سہولیات فراہم کرنے والے بڑے ادارے آدمجی لائف آشورنس -ونڈو تکافل آپریشن نے ملک میں اسلامک میوچل فنڈز کے مایہ ناز ادارے فیصل فنڈز کے ساتھ سٹریٹجک پارٹنرشپ کااعلان کیا ہے۔ اس اشتراک کے تحت فیصل فنڈز کے یونٹ ہولڈرز کو بیمہ زندگی کی اضافی مراعات فراہم کی جائیں گی جس کی بدولت ان کے لئے مالی تحفظ اور ذہنی سکون یقینی بنانے میں مدد ملے گی۔

پارٹنرشپ کی بدولت آدمجی لائف آشورنس صارفین کی ضرورت کے مطابق تیار کی گئی اپنی فیملی تکافل کی سہولیات کے تحت فیصل فنڈ کے یونٹ ہولڈرز کو اپنی بے مثال تکافل خدمات فراہم کرے گا۔ یہ اقدام دونوں اداروں کے اس عزم کی عکاسی کرتا ہے کہ اپنی مالی سہولیات کے ذریعے لوگوں کو بااختیار بنایا جائے۔

اس موقع پر اظہار خیال کرتے ہوئے آدمجی لائف آشورنس کے چیف ایگزیکٹو آفیسرجناب منظر مشتاق نے فیصل فنڈز کے ساتھ اشتراک اور یونٹ ہولڈرز کو فیملی تکافل کی خدمات کی فراہمی پر مسرت کا اظہار کیا۔ انہوں نے کہا کہ یہ پارٹنرشپ مالی تحفظ کی جدت آمیز سہولیات کی فراہمی پر ہمارے پختہ عزم کی عکاسی کرتی ہے۔

فیصل فنڈز کے چیف ایگزیکٹو آفیسر جناب نادر رحمان نے کہا کہ مالی خدمات فراہم کرنے والے ایک ادارے کی حیثیت سے ہماری ہمہ وقت کوشش ہے کہ اپنے معزز کلائنٹس کی خوشحالی کو یقینی بنایا جائے۔ انہوں نے مزید کہا کہ آدمجی لائف آشورنس کے ساتھ پارٹنرشپ اور اس کے تحت بیمہ زندگی کی مراعات کی فراہمی سے ہماری خدمات اور سہولیات کو مزید استحکام ملے گا۔

فیصل فنڈز اور آدمی لائف آشورنس کے درمیان یہ پارٹنرشپ اس بات کی علامت ہے کہ دونوں ادارے آج کے دور میں سرمایہ کاروں کی بدلتی ضروریات سے بخوبی آگاہ ہیں۔ اس سے بیمہ زندگی کی سہولت کو مالی خدمات اور سرمایہ کاری کی حکمت عملیوں میں ضم کرنے کی اہمیت بھی اجاگر ہوتی ہے۔